Þórhallur Sigurðsson (Laddi) 20.01.1947-

Þórhallur Sigurðsson, best þekktur sem Laddi, er íslenskur leikari, söngvari, tónskáld og skemmtikraftur. Hann hefur gefið út plötur, leikið í kvikmyndum og tekið þátt í miklum fjölda skemmtiþátta sem handritshöfundur og leikari, t.d Heilsubælinu, Imbakassanum og Spaugstofunni. Einnig hefur hann leikið í mörgum Áramótaskaupum og tekið þátt í að semja þau. Hann hefur skapað fjöldann allan af karakterum sem margir kannast við og nægir að nefna Eirík Fjalar, Saxa lækni, Skúla rafvirkja, Magnús bónda, Ho Si Mattana, Elsu Lund, Martein Mosdal og svo mætti lengi telja. Kvikmyndir sem hann hefur leikið í eru t.d Stella í orlofi, Stella í framboði, Magnús, Regína, Íslenski draumurinn, Jóhannes, Ófeigur gengur aftur og fleiri. Einnig hefur hann starfað mikið í leikhúsi, en frægustu hlutverk hans á þeim vettvangi eru líklega Fagin í Óliver Twist og Tannlækninn í Litlu Hryllingsbúðinni.

Laddi var í tvíeykinu Halli og Laddi ásamt bróður sínum Haraldi Sigurðssyni. Þeir bræður nutu gríðarlegra vinsælda á áttunda áratug síðustu aldar, þóttu ómissandi í skemmtiþáttum í sjónvarpi og gáfu út nokkrar hljómplötur með tónlist og gamanmálum. Þekktasta plata þeirra er líklega „Látum eins og ekkert C“, sem þeir gerðu ásamt Gísla Rúnari Jónssyni.

Laddi hóf tónlistarferil sinn sem trommari í hljómsveitinni „Föxum“. Í seinni tíð hefur hann samið fjölda laga og mörg þeirra hafa náð vinsældum, t.d. Sandalar, Austurstræti og Búkolla, en útgefin lög hans og textar skipta tugum. Hann starfaði um tíma með hljómsveitinni „Brunaliðinu“, en mest af tónlistarefni hans hefur komið út á sólóplötum eins og „Einn voða vitlaus“ og „Deijó“, auk þess sem það er að finna á fjölmörgum safnplötum.

Á níunda áratugnum stofnuðu Halli og Laddi HLH flokkinn ásamt Björgvini Halldórssyni. Flokkurinn stældi útlit og tónlistarstíl rokktímans milli 1950 og '60 og átti nokkra sívinsæla smelli eins og „Riddari götunnar“, „Seðill“ og „Í útvarpinu heyrði lag“...

Af Wikipedia-síðu um Þórhall (27. maí 2015)


Tengt efni á öðrum vefjum

Lagahöfundur, leikari, skemmtikraftur, söngvari og tónlistarmaður
Ekki skráð

Jón Hrólfur Sigurjónsson uppfærði 27.05.2015