Guðmundur Gilsson 22.07.1926-06.01.1992

Fregnin um andlát Guðmundar Gilssonar kom ekki á óvart. Hann hafði barist við erfiðan sjúkdóm, drengilegri og æðrulausri baráttu uns yfir lauk, en hann féll með sæmd.Við dánarfregn setur mann hljóðan og upp hrannast minningarnar um samferðamanninn og vininn, sem nú er allur.

Guðmundur Gilsson var vel menntaður og virtur tónlistarmaður. Hann nam orgelleik hjá dr. Páli Ísólfssyni hér heima og hélt síðan utan til framhaldsnáms í Hamborg, þar sem hann naut handleiðslu prófessors Förstemanns.

Þegar heim kom réðst hann fljótlega til starfa í Árnesþingi, þar sem hann var organisti og tónlistarkennari.Eftir að hann flutti til Reykjavíkur hóf hann störf við tónlistardeild Ríkisútvarpsins og sem kirkjuorganisti, fyrst í Garðabæ, síðan í Kópavogskirkju, en því starfi gegndi hann til dauðadags.Guðmundur var lengi virkur félagi í Félagi íslenskra organleikara og sat um hríð í stjórn félagsins. Hann var ötull talsmaður fyrir bættri menntun organistastéttarinnar og vildi jafnan veg hennar sem mestan.

Ég kynntist Guðmundi á námsárunum og hafði verið kunnugur honum lengi er ég haustið 1985 gerðist aðstoðarmaður hans um tveggja ára skeið í Kópavogskirkju. Þau ár eru ljúf í endurminningunni og fannst mér ég margt af okkar samstarfi læra. Þá staðfestist það sem ég löngum hafði gert mér í hugarlund, að Guðmundur hafði mikinn drengskaparmann að geyma.

Haustið sem sjúkdómurinn greindist hjá honum, fórum við þrír orgelleikarar saman akandi upp á Akranes til þess að skoða nýtt orgel Akraneskirkju. Guðmundur lék á als oddi á leiðinni og lék eins og engill á nýja orgelið. Á heimleiðinni urðu miklar umræður um þetta nýja hljóðfæri, kosti þess og galla. Þar talaði Guðmundur af mikilli þekkingu. Hann hafði þann góða hæfileika að setja mál sitt fram á eftirtektarverðan hátt og vissulega vorum við hinir margs vísari er ferðinni lauk.

Útför Guðmundar var gerð í kyrrþey að ósk hans. Guðmundur var ekki þeirrar gerðar að vilja hafa tilstand í kringum sjálfan sig og því kom sú ákvörðun hans síst á óvart.Fyrir hönd Félags íslenskra organleikara sendi ég eftirlifandi ástvinum hans dýpstu samúðarkveðjur og mun jafnan minnast hans er ég heyri góðs manns getið.

Minning. Organistablaðið. 1. júlí 1993, bls. 2.

Sjá einnig: Kennaratal á Íslandi, 1. bindi bls. 188.

Staðir

Kópavogskirkja Organisti 1972-1992
Selfosskirkja Organisti 1955-

Tengt efni á öðrum vefjum

Organisti og tónlistarmaður

Hugi Þórðarson uppfærði 12.12.2014