Elma Gíslason 28.02.1910-24.11.1987

Elma Gíslason er fædd í Glenboro, Manitoba, 28. febrúar 1910. Foreldrar hennar voru Ingólfur Árnason, nýdáinn, og kona hans María Frímannsdóttir, sem lengi bjuggu í Glenboro og Eypress River bygð. Elma fékk almenna uppfræðslu í barna og miðskóla í Eypress River. Þrettán ára byrjaði hún að læra píanóspil hjá Steingrími Hall og síðar hjá fleiri kennurum, en aðrar greinar söngfræðinnar hjá Gwenda Owen Davis. Tók hún kennarapróf undir umsjón „Toronto Conservatory of Music“ með hárri einkum. Brátt kom það í ljós, að hún hafði fagra söngrödd; og hefir hún nú í mörg ár stundað söngnám og raddþjálfun hjá bestu kennurum borgarinnar. Mun fyrsti kennari hennar hafa verið hinn velþekti söngmaður Pétur Magnús, næst frú Sigríður Olson, Roberto Wood og nú seinast franska söngkonan Therese Deniset. Elma giftist árið 1932 og heitir maður hennar Ragnar Gíslason. Þau Ragnar og Elma hafa eignast 4 börn.

Elmu má nú óhætt telja eina hina bestu söngkonu íslenska hér vestan hafs, þeirra er nú lifa og starfa. Hún heldur fastri stöðu í Sambandskirkjunni íslensku hér í borg, og syngur auk þess iðulega á opinberum söngmótum. Eigi als fyrir löngu söng hún aðal sópranó hlutverkið í hinni alþektu og frægu Oratóríu Handels, Messiah, undir stjórn hins merka tónfræðings Bernard Naylors, og fékk mjög vinsamleg ummæli enskra blaða.

Á síðari árum hefir Elma fengist dálítið við sönglagagerð, þrátt fyrir margvíslegar annir dagsins. Fyrsta lag hennar var við kvæði eftir Bergþór E. Johnson, sem dó hér á síðastliðnum vetri. Lagið heitir „Dagsetur“. Annað lag er við kvæði Páls S. Pálssonar: „Þú söngst mér lag“. Hið þriðja er við kvæði Richards Beek: „Sál minni vaxa vængir.“ . Fjórða lagið er við sálminn „Í Betlehem er barn oss fætt,“ þar sem öll versin eru tengd saman í einn hátíðasöng, fagurt lag og frumlegt. Fimta lagið, sem ég hefi frétt um, er við kvæði eftir tengdaföður hennar, Hjálmar Gíslason og byrjar svo: „Renni, renni rekkja mín“. Flest þessi lög hefir hún sungið sjálf á samkomum og við kirkju, og hafa vakið talsverða athygli, enda láta þau vel að rödd hennar og eru nokkuð frábrugðin því, er almennt gerist. Þess má geta, að lög hennar hafa fengið mjög lofsverð ummæli merkra söngfræðinga.

Nokkur Vestur-Íslensk tónskáld. Gísli Jónsson. Tímarit Þjóðræknisfélags Íslendinga. 1. janúar 1950, bls. 81.


Tengt efni á öðrum vefjum

Lagahöfundur og söngkona
Ekki skráð

Jón Hrólfur Sigurjónsson uppfærði 28.02.2014