Anna Pálína Árnadóttir 09.03.1963-08.11.2004

Anna Pálína var ein dáðasta og vinsælasta vísnasöngkona á Íslandi. Á stuttum ferli náði hún að skapa sér sérstöðu meðal íslenskra söngkvenna. Efnisskrá hennar var fjölbreytt og spannaði allt frá hefðbundinni norrænni vísnatónlist yfir í íslensk sönglög, þjóðlög, barnatónlist, sálma og djasstónlist. Hún var einnig þjóðþekkt fyrir dagskárgerð sína í útvarpi og árið 2004 kom út bók hennar Ótuktin sem vakti mikla athygli en þar sem hún fjallaði um sambúðina við Kröbbu frænku. Anna Pálína lést úr krabbameini á hátindi ferils síns aðeins 41 árs að aldri.

Helstu hljóðritanir:

  1. Á einum á máli (ásamt Aðalsteini Ásberg), 1992
  2. Von og vísa (ásamt Gunnari Gunnarssyni), 1994
  3. Fjall og fjara (ásamt Aðalsteini Ásberg), 1996
  4. Berrössuð á tánum (ásamt Aðalsteini Ásberg), 1998
  5. Bláfuglinn, 1999
  6. Bullutröll (ásamt Aðalsteini Ásberg), 2000
  7. Guð og gamlar konur, 2002
  8. Sagnadans (ásamt Draupner), 2004
  9. Komdu að syngja – DVD (ásamt Gunnari Gunnarssyni), 2006
  10. Anna Pálína – BEZT, 2011
  11. Lífinu ég þakka (2 cd) á tónleikum og heimavelli, 2013

Anna Pálína lauk stúdentsprófi frá Flensborgarskóla í Hafnarfirði 1983 og B.ed. prófi frá Kennaraháskóla Íslands 1988. Hún stundaði ennfremur tónlistarnám við Tónlistarskóla FÍH á árunum1990-1994 og hjá einkakennurum, innlendum sem erlendum.

Anna Pálína var kennari við Austurbæjarskóla 1988-1990 og lausráðinn dagskrárgerðarmaður hjá Ríkisútvarpinu frá 1992 til 2004. Hún var afkastamikil á tónlistarsviðinu, hélt tónleika víða innanlands og utan jafnt fyrir börn og fullorðna, kom fram fyrir Íslands hönd á norrænum tónlistarhátíðum og var ötull talsmaður norrænnar vísnatónlistar.

Hún sat í stjórn tónlistarfélagsins Vísnavina 1992-1998 og var formaður félagsins 1993-1998. Þá var hún framkvæmdastjóri Norrænna vísnadaga 1994 og 1996. Auk þess rak hún útgáfufyrirtækið Dimmu ásamt eiginmanni sínum frá 1992.

Anna Pálína hlaut viðurkenningu Íslandsdeildar IBBY árið 1999 fyrir barnaplötuna Berrössuð á tánum. Einnig hlaut hún starfslaun listamanna árið 2000 og starfslaun Reykjavíkurborgar 2002. Plata hennar Guð og gamlar konur var tilnefnd til Íslensku tónlistarverðlaunanna árið 2003. Anna Pálína vakti mikla athygli með fyrirlestrum sínum um að lifa með hinum óboðna gesti krabbameini og bók hennar um það efni, Ótuktin, kom út vorið 2004.

Af vef Dimmu - útgáfu (desember 2013).

Staðir

Flensborgarskólinn í Hafnarfirði Nemandi -1983
Kennaraháskóli Íslands Háskólanemi -1988
Tónlistarskóli Félags íslenskra hljómlistarmanna Tónlistarnemandi 1990-1994
Austurbæjarskóli Kennari 1988-1990
Ríkisútvarpið Dagskrárgerðarmaður 1992-

Tengt efni á öðrum vefjum

Dagskrárgerðarmaður, háskólanemi, kennari, nemandi, rithöfundur, söngkona og tónlistarnemandi

Jón Hrólfur Sigurjónsson uppfærði 1.06.2015