Finnbogi Guðmundsson 08.01.1924-03.04.2011
<blockquote>[Finnbogi var] sonur Laufeyjar Vilhjálmsdóttur kennara og Guðmundar Finnbogasonar, heimspekings, prófessors og landsbókavarðar.
<br><br>
Guðmundur var sonur Finnboga Finnbogasonar, bónda á Arnarstapa í Ljósavatnsskarði, og Guðrúnar Jónsdóttur frá Belgsá, en Laufey var dóttir Vilhjálms, bónda á Rauðará við Reykjavík, sonar Björns Halldórssonar, prófasts, skálds og þfm. í Laufási í Eyjafirði. Móðir Laufeyjar var Sigríður Þorláksdóttir, prests á Skútustöðum, bróður Benedikts, afa Geirs Hallgrímssonar forsætisráðherra. Bróðir Vilhjálms var Þórhallur biskup, faðir Tryggva forsætisráðherra og Dóru forsetafrúar. Bróðir Guðmundar var Karl Finnbogason skólastjóri, en bróðir Laufeyjar var Halldór, skólastjóri á Hvanneyri, afi Sveins Runólfssonar landgræðslustjóra.
<br><br>
Bróðir Finnboga var Örn, faðir Guðmundar Páls, skólastjóra Bridgeskólans og heimsmeistara í bridge.
<br><br>
Eiginkona Finnboga var Kristjana P. Helgadóttir læknir sem lést 1984. Þau eignuðust dótturina Helgu Laufeyju og fósturdóttur, Selmu Jónsdóttur.
<br><br>
Finnbogi lauk stúdentsprófi frá MR 1943 og cand.mag.-prófi í íslenskum fræðum frá HÍ 1949. Hann lauk doktorsprófi frá HÍ 1961.
<br><br>
Finnbogi kenndi um árabil, var m.a. stundakennari við MR, aðstoðarkennari við Manitobaháskóla og sendikennari við Óslóarháskóla og Björgvinjarháskóla. Hann var einnig dósent við HÍ um tíma. Finnbogi var landsbókavörður á árunum 1964-94. Eftir hann liggur fjöldi ritverka, frumsamin og þýðingar. Hann annaðist útgáfu fjölda rita, m.a. fornrita og rita föður síns.
<br><br>
Finnbogi sat í stjórn Þjóðræknisfélags Íslendinga í Vesturheimi og var heiðursfélagi þess, formaður Félags íslenskra fræða og forseti Hins íslenska þjóðvinafélags. Hann var formaður byggingarnefndar Þjóðarbókhlöðunnar frá 1970.</blockquote>
<p align="right">Merkir Íslendingar. Morgunblaðið 8. janúar 2016, bls. 35.</p>
Staðir
| Menntaskólinn í Reykjavík | Nemandi | -1943 |
| Háskóli Íslands | Háskólanemi | -1961 |
| Menntaskólinn í Reykjavík | Menntaskólakennari | - |
| Háskólinn í Manitoba | Háskólakennari | - |
| Háskóli Íslands | Háskólakennari | - |
| Háskólinn í Ósló | Háskólakennari | - |
| Háskólinn í Björgvin | Háskólakennari | - |
Tengt efni á öðrum vefjum
Jón Hrólfur Sigurjónsson uppfærði 8.01.2016