Gunnar Sigurgeirsson 17.10.1901-09.07.1970

Gunnar Sigurgeirsson fæddist 17. október 1901 að Stóruvöllum í Bárðardal, sonur hjónanna Sigurgeirs Jónssonar, söngkennara og síðar organista á Akureyri og k. h. Friðriku Tómasdóttur. Systkinin voru alls 9 og lærðu öll að leika á hljóðfæri. Tvö þeirra, Gunnar og Herrnína, gerðu tónlistarkennslu að ævistarfi. Kennarar Gunnars í tónlist voru fyrst og fremst faðir hans, síðar Kurt Heaser, Þjóðverji, sem stundaði tónlistarkennslu á Akureyri á árunum 1922-1924 á vegum Músíkfélags Akureyrar. Eftir að Gunnar fluttist til Reykjavíkur naut hann tilsagnar Emils Thoroddsens, dr. Franz Mixa og dr. Victors Urbancic. Auk þess las hann mikið um tónlist og hlustaði á hljómplötur. Plötusafn Gunnars bar vott þroskuðum tónlistarsmekk hans.

Árið 1929 giftist Gunnar eftirlifandi konu sinni, Hönnu D. Jacobsen frá Sandvogi i Færeyjum. Þeim varð 2ja barna auðið, sem heita Friðgeir og Erla.

Um skeið rak hann nótna- og hljóðfæraverzlun á Akureyri, en aðalstarf hans var þó píanókennsla, og er til Reykjavíkur kom, tók hann um skeið að sér þjálfun kóra s. s. Breiðfirðingakórs og Lögreglukórs. Þá var hann einnig söngkennari í skólum, en frá árinu 1953, gerðist hann organleikari og söngstjóri við Háteigskirkju og gegndi því starfi, ásamt píanókennslunni, til dauðadags. Gunnar þótti einkar laginn kennari, enda barngóður og hið mesta ljúfmenni. Gunnar var stór vexti, mikill að vallarsýn. Munu nemendur hafa hænzt að honum vegna rólegrar og elskulegrar framkomu.

Hinna góðu eiginleika Gunnars nutum við félagar hans í F. La. í ríkum mæli, enda starfaði hann vel og af miklum áhuga fyrir félagið og málefni þess, nú síðustu árin sem formaður blaðnefndar „Organistablaðsins“ og útsölumaður þess. Við það starf vann hann vel, enda tillögugóour, lipur og samvinnuþýður. Í kringum hann ríkti ætíð fegurð og friður.

Félag íslenzkra organleikara þakkar honum störfin og samveruna. Gunnar andaðist 9. júlí og var jarðsunginn frá Háteigskirkju hinn 15. júlí síðastliðinn.

Páll Kr. Pálsson. Organistablaðið 2. tbl. Nóvember 1970, bls. 21.

Sjá einnig: Kennaratal á Íslandi, 1. bindi bls. 235.

Staðir

Háteigskirkja Organisti 1953-1970

Tengt efni á öðrum vefjum

Hugi Þórðarson uppfærði 12.12.2014