Þorgerður Ingólfsdóttir 05.11.1943-

Þorgerður stundaði alhliða tónlistarnám frá sjö ára aldri. Hún lauk stúdentsprófi frá Menntaskólanum í Reykjavík 1963, tónmenntakennaraprófi frá Tónlistarskólanum í Reykjavík 1965 og nam í kjölfarið tónvísindi og kórstjórn á meistarastigi við University of Illinois í Bandaríkjunum. Formlegt tónlistarnám hefur hún einnig stundað í Austurríki, Bretlandi, Ísrael, Noregi og Sviss og nam að auki guðfræði um tíma við Háskóla Íslands.

Þorgerður stofnaði Kór Menntaskólans við Hamrahlíð árið 1967 og árið 1982 framhaldskór hans, Hamrahlíðarkórinn. Undir forystu Þorgerðar hafa kórarnir tveir unnið hvern sigurinn af öðrum, hvort sem er á tónleikum innanlands eða á alþjóðlegum tónlistarhátíðum víða um heim. Á þriðja þúsund ungmenna hafa hlotið tónlistaruppeldi í Hamrahlíðarkórunum hjá Þorgerði, meðal þeirra eru margir af fremstu tónlistarmönnum þjóðarinnar.

Auk þess að stjórna Hamrahlíðarkórunum kenndi Þorgerður við Tónlistarskólann í Reykjavík í tæp þrjátíu ár. Hún sá um kynningar á fjölskyldu- og skólatónleikum Sinfóníuhljómsveitar Íslands í sjö ár og var framkvæmdastjóri Zukofsky-tónlistarnámskeiðanna fyrstu árin. Hún var fulltrúi tónlistarmanna í stjórn Bandalags íslenskra listamanna í mörg ár og fulltrúi Íslands á sviði tónlistar í Kaleidoscope-verkefni Evrópusambandsins, í Sleipni og í norrænu tónlistarnefndinni, NOMUS. Þorgerður hefur tekið mjög virkan þátt í alþjóðlegu samstarfi á sviði tónlistar og m.a. setið í dómnefndum í ýmsum alþjóðlegum tónlistarkeppnum. Hún er einn af stofnendum Alþjóðlega kórasambandsins og á sæti í ráðgjafanefnd Heimsleikanna í kórtónlist. Þorgerður var aðalstjórnandi æskukórsins Radda Evrópu sem var viðamesta samstarfsverkefni menningarborga Evrópu árið 2000 og árið 2011 stjórnaði hún jafnframt Röddum Íslands, kór 150 ungra kórsöngvara af öllu landinu sem kom fram á opnunarhátíð Hörpu.

Hamrahlíðarkórarnir hafa undir stjórn Þorgerðar haldið tónleika í 23 löndum, komið fram á mörgum helstu kórahátíðum heims í Evrópu, Norður-Ameríku og Asíu og hlotið margvísleg verðlaun. Fjölmörg tónskáld, íslensk og erlend, hafa samið verk fyrir Þorgerði og kórana hennar auk allra þeirra raddsetninga, ljóðaþýðinga og söngtexta sem samin hafa verið fyrir kórana. Undir stjórn Þorgerðar hafa kórarnir gert ótal margar upptökur fyrir útvarp og sjónvarp innan lands sem utan og þrjár hljómplötur og átta geisladiskar hafa komið út með söng kóranna og hafa hlotið viðurkenningar og lofsamlega dóma.

Þorgerður hefur hlotið margvíslega viðurkenningu fyrir störf sín og list, s.s. Bjartsýnisverðlaun Bröstes, menningarverðlaun DV, heiðursverðlaun Samfélagsverðlauna Fréttablaðsins, riddarakross hinnar íslensku fálkaorðu og stórriddarakross hinnar konunglegu norsku heiðursorðu. Árið 2012 var Þorgerður borgarlistamaður Reykjavíkur og árið 2013 var hún sæmd heiðursverðlaunum Íslensku tónlistarverðlaunanna.

Morgunblaðið. 5. nóvember 2013, bls. 26-27: Þorgerður Ingólfsdóttir, kórstjóri – 70 ára.

Staðir

Menntaskólinn í Reykjavík Nemandi -1963
Tónlistarskólinn í Reykjavík Tónlistarnemandi -1965

Tengt efni á öðrum vefjum

Kórstjóri, nemandi, tónlistarkennari og tónlistarnemandi
Ekki skráð
Ekki skráð

Jón Hrólfur Sigurjónsson uppfærði 17.07.2018