Eyþór Stefánsson 21.01.1901-03.11.1999

Eyþór Stefánsson fæddist á Sauðárkróki 23. janúar 1901. Foreldrar hans voru Stefán Sigurðsson, sjómaður á Sauðárkróki, f. 27. maí 1856, d. 14. des. 1921, og Guðrún Jónasdóttir, húsfreyja Sauðárkróki, f. 9. mars 1857, d. 6. október 1935. Systkini hans voru Stefán Stefánsson, f. 7. maí 1883, d. 16. júlí 1929, og Anna María Stefánsdóttir, f. 26. október 1887, d. 1. nóvember 1956. Hann gekk í barna- og unglingaskólann á Sauðárkróki, en 1928 fór hann suður í tónlistarnám hjá Emil Thoroddsen og Páli Ísólfssyni og leiklistarnám hjá Indriða Waage. Hann var síðan við framhaldsnám í þessum greinum í Hamborg 1934. Hann var aðeins 11 ára gamall er hann byrjaði að syngja með kirkjukór Sauðárkróks en kórinn var ekki formlega stofnaður fyrr en 1942 að hans tilstuðlan sem var fyrsti stjórnandi hans. Hafði hann þá verið organisti og söngstjóri við Sauðárkrókskirkju frá árinu 1929 og gegndi hann þeim störfum allt til ársins 1972.

19 ára gamall byrjaði Eyþór að vinna að söng- og leiklistarstörfum fyrir Ungmennafélagið Tindastóls, eins var hann einn af þeim sem endurreistu Leikfélag Sauðárkróks 1941 og starfaði þar sem leikstjóri og leikari allt til ársins 1976 er hann steig síðast á svið, var það hans 118. hlutverk. Hann vann við verslunar- og skrifstofustörf á Sauðárkróki 1923-1948, og var söngkennari við Barna- og gagnfræðaskóla Sauðárkróks 1948-1972. Skólastjóri Tónlistarskólans 1964-1974. Formaður framkvæmdanefndar um byggingu minnisvarða Stephans G. Stephanssonar á Arnarstapa 1953. Hann var á tímabili formaður Kirkjukórasambands Skagafjarðarprófastsdæmis, sat í stjórn Kirkjukórasambands Íslands og var sendikennari þess til kirkjukóra á Norður-, Austur- og Vesturlandi 1952-1961. Hann var einn af stofnendum Rotaryklúbbs Sauðárkróks 1948 og fræðslustúkunnar Mælifells, innan frímúrarareglunnar á Íslandi 1970. Hann var heiðursfélagi í mörgum félögum, þar á meðal: Kirkjukór Sauðárkróks, Leikfélagi Sauðárkróks, Ungmennafélaginu Tindastól, Rotaryklúbbi Sauðárkróks, Tónskáldafélaginu, var sæmdur heiðursmerki úr silfri frá Karlakórasambandinu Heklu á Akureyri, gullmerki frá Félagi íslenskra leikara og var heiðursborgari Sauðárkróks frá árinu 1971.

Eins var hann sæmdur stórriddarakrossi hinnar íslensku fálkaorðu fyrir störf sín að menningarmálum á Sauðárkróki.

Eyþór kvæntist 13. desember 1936 Sigríði Önnu Stefánsdóttur frá Skógum í Þelamörk, f. 29. september 1905, d. 20. júní 1992. Sigríður tók virkan þátt í störfum Eyþórs bæði í leiklist og tónlist. Þau eignuðust eina dóttur, Guðrúnu Eyþórsdóttur, f. 24. júlí 1939, d. 17. apríl 1987. Maki Einar Valur Kristjánsson, f. 16. ágúst 1934, d. 7. september 1996. Börn þeirra: 1) Eyþór Kristján, búsettur á Sauðárkróki, maki Ásgerður Gísladóttir, og eiga þau tvö börn. 2) Sigríður, búsett á Akranesi, maki Óli Páll Engilbertsson og eiga þau tvö börn. 3) Atli Stefán, búsettur í Hafnarfirði, maki Ingunn Helgadóttir og eiga þau tvö börn. 4) Auðunn, búsettur á Ísafirði.

Úr minningargrein í Morgunblaðinu 13. nóvember 1999, bls. 50.

Sjá einnig Kennaratal á Íslandi 1. bindi. bls. 135. Prentsmiðjan Oddi hf. 1958.

Staðir

Sauðárkrókskirkja Organisti 1929-1972

Skjöl


Tengt efni á öðrum vefjum

Organisti og tónskáld

Hugi Þórðarson uppfærði 12.12.2014