Gunnar Guðbjörnsson 05.07.1965-

Gunnar Guðbjörnsson hóf söngnám hjá Snæbjörgu Snæbjarnardóttur í Tónlistarskóla Garðabæjar árið 1984 og síðar stundaði hann nám hjá Sigurði Demetz í Nýja Tónlistarskólanum, þaðan sem hann lauk burtfararprófi í desember 1987. Framhaldsnám stundaði Gunnar í Austur-Berlín hjá Frau Hanne-Lore Kuhse og siðar Michael Rhodes í Þýskalani. Einnig sótti hann söngtíma og námskeið hjá hinum heimsþekkta sænska söngvara Nicolai Gedda í Vín og borginni Morges í Sviss. Síðar á ferli sínum varð kammersöngvarinn Rainer Goldberg í Berlín ráðgjafi Gunnars. Á árunum 1990-91 var hann meðlimur í National Opera Studio í London og lauk þaðan Post-graduate námi.

Gunnar þreytti frumraun sína á óperusviðinu hjá Íslensku Óperunni árið 1988 í hlutverki Don Ottavio í óperunni Don Giovanni eftir Mozart. Hann söng víða í tónleikasölum og óperum á námsárunum en strax að loknu námi réðst hann sem lýriskur tenór til Ríkisóperunnar í Wiesbaden en þar var hann til ársins 1995. Á árunum 1995-97 var hann svo fyrsti lýriski tenór Þjóðaróperunnar í Lyon í Frakklandi.

Gunnar hefur einnig sungið í fjölda annarra óperuhúsa og má þar nefna Grand Theatre í Genf, óperurnar í Lissabon, Marseille, Toulouse, Lille, Montpellier, Opera National í París (Bastille), Frankfurter Oper, Staatsoper Hamburg, Nationaltheater í München, Kölner Oper, Deutsche Staatsoper, Deutsche Oper í Berlín og Wiener Staatsoper. Á Ítalíu hefur Gunnar sungið í óperunum í Bologna, Feneyjum og Palermo.

Á tónleikapallinum hefur Gunnar einnig verið virkur og sungið víða. Má þar nefna Alte Oper í Frankfurt, Salle Pleyel í París, Albert Hall í London og Berlínar Fílharmoníunni en þar þreytti hann frumraun sína með Fílharmóníusveit Berlínar í maí 1999. Einsöngstónleika hefur hann sungið m.a. í Wigmore Hall og Covent Garden óperunni í London, Staatsoper í Berlín, í Salle Gaveau í París og á Aix-en-Provence hátíðinni í Frakklandi. Utan Evrópu hefur hann sungið með Sinfóníuhljómsveitunum í Ísrael, Singapore og Chicago í Bandaríkjunum. Hann hefur átt samstarf við marga þekkta stjórnendur og má þar nefna Helmut Rilling, Kent Nagano, Jeffrey Tate, Antonio Pappano, Sir Neville Marriner og Daniel Barenboim.

Hlutverkaskrá Gunnars er mjög fjölbreytt en hún hefur að geyma öll helstu aðalhlutverkin í óperum Mozart en einnig Nemorino í Ástardrykknum, Fenton í Falstaff, Lensky í Eugene Onegin, Quint í óperu Brittens Turn of the screw, Almaviva í Rakaranum frá Sevilla, Stýrimanninn í Hollendingnum fljúgandi og Rodolfo í La Boheme.

Í september 2007 þreytti Gunnar frumraun sína í hlutverki hetjutenórs þegar hann söng Walther von Stolzing í óperunni Meistarasöngvararnir frá Nurnberg í óperuhúsinu í Halle í Þýskalandi. Síðan þá hefur hann sungið m.a. Das Lied von der Erde í Kiel og komið fram í Opera de Paris (Bastille) en veturinn 2008/9 söng Gunnar hlutverk Idomeneo í óperunni í Osnabrueck, Max í Freischuetz eftir Weber og Siegfried í samnefndri óperu Wagners í Freiburg og veturinn 2009/10 söng hann einnig í því óperuhúsi hlutverk Heródesar í Salóme eftir Strauss og Hueon í óperu Webers, Oberon. Haustið 2011 söng Gunnar tenórsólóið í Requiem eftir Dvorak með Sinfóníuhljósmveit Gautaborgar en framundan eru m.a. tónleikar í Svíþjóð árið 2013 þar sem hann syngir tenórhlutverkið í 9. sinfóníu Beethovens.

Gunnar hefur frá haustinu 2010 einnig starfað sem blaðamaður og umsjónarmaður á Menningarpressunni og nú nýlega hóf hann störf á Smugumenningu á Smugan.is. Gunnar lýkur meistaraprófi sínu í Menningarstjórnun frá Háskólanum á Bifröst vorið 2012.

Af vefsíðu Gunnars.


Tengt efni á öðrum vefjum

Söngvari og tónlistarmaður
Ekki skráð
Ekki skráð

Jón Hrólfur Sigurjónsson uppfærði 11.10.2013