Helga Rós Indriðadóttir 22.06.1969-

<p>Helga Rós Indriðadóttir stundaði nám við Tónlistarskólann í Reykjavík og lauk þaðan tónmenntakennaraprófi árið 1992 og söngkennara- og einsöngvaraprófi árið 1996. Þá tók við þriggja ára nám við Tónlistarháskólann í Stuttgart þar sem hún stundaði nám við ljóðadeild og lauk árið 1999 mastersprófi frá óperudeildinni.</p> <p>Á lokaári námsins var hún fastráðin við Óperuhúsið í Stuttgart og debúteraði sem Freyja í Rínargulli Wagners. Næstu átta árin söng hún fjölda hlutverka m.a. Nínettu í Ástin á appelsínunum þremur, Antoníu í Ævintýrum Hoffmanns, Zerlinu í Don Giovanni, Ines í Il Trovatore, Ortlinde í Valkyrjunum, Woglinde í Ragnarökum og Florice í frumflutningi á Pastorale eftir Gerard Pesson. Auk þess var hún gestasöngvari í óperuhúsunum í Bonn, Wiesbaden og Karlsruhe. Í DVD útgáfu og hljóðritun Naxos af aldamótauppsetningu Niflungahrings Wagners frá óperunni í Stuttgart er Helga Rós í hlutverki Freyju í Rínargullinu og Woglinde í Ragnarökum.</p> <p>Helga Rós hefur sungið Sálumessur Mozarts og Verdis, Sköpunina, Árstíðirnar og Teresíumessu Haydns, Elías eftir Mendelssohn, Saul eftir Händel, Missa Solemnis og 9. sinfóníu Beethovens, f-moll messu Bruckners, Orfeo eftir Pergolesi og Les Illuminations eftir Britten. Hún hefur einnig sungið fjölda ljóða- og kammertónleika bæði hér heima og erlendis m.a. til að fylgja eftir geisladisk með sönglögum Jórunnar Viðar sem hún gaf út ásamt Guðrúnu Dalíu Salómonsdóttur píanóleikara árið 2009.</p> <p>Sumarið 2011 stóð hún fyrir tónleikunum „Óperutöfrar“ í Menningarhúsinu Miðgarði í Skagafirði. Á árunum 2010 til 2012 stýrði Helga Rós Karlakórnum Heimi í Skagafirði og tók við stjórn Skagfirska kammerkórsins í ársbyrjun 2013 ásamt því að stunda kennslu við Tónlistarskóla Skagafjarðar. Í mars 2013 söng Helga Rós hádegistónleika ásamt Antoniu Hevesi píanóleikara á vegum Íslensku óperunnar og haustið 2014 söng hún hlutverk Elisabettu í Don Carlo eftir Verdi hjá Íslensku óperunni.</p> <p align="right">Af vef Íslensku óperunnar (15. mars 2016)</p>

Staðir

Tónlistarskólinn í Reykjavík Tónlistarnemandi -1996
Tónlistarskóli Skagafjarðar Tónlistarkennari -

Tengt efni á öðrum vefjum

Jón Hrólfur Sigurjónsson uppfærði 15.03.2016