Daníel Ágúst Haraldsson 26.08.1969-

Daníel Ágúst varð þjóðþekktur og fékk gömul hippahjörtu til að slá hraðar þegar hann kom fyrst fram á sjónarsviðið með hljómsveitinni Nýdönsk sem stofnuð var árið 1987.

Það verður seint tekið af honum að þar er á ferð fantagóður söngvari og af þeim sökum skrapp hann árið 1989 með lag Valgeirs Guðjónssonar; Það sem enginn sér, í Eurovision keppnina fyrir hönd okkar Íslendinga. Þetta var í fjórða sinn sem við tókum þátt í þessari keppni og í öll skiptin á undan höfðum við hafnað í sextánda sæti. Með framgöngu Daníels varð breyting þar á, því nú bar svo við að lag Íslendinga lenti í neðsta sæti með ekkert stig - zero points! Eftir keppnina kölluðu gárungarnir lagið Það sem enginn sá né heyrði.

Daníel Ágúst lét þetta mótlæti ekki slá sig út af laginu og hélt áfram að rækta garðinn sinn með Nýdanskri, auk þess að sinna öðrum verkefnum á sviði söngs og tónlistar. Hann ljáði Rabba trommuleikara rödd sína á plötunni Andartak árið 1991 og söng þar lagið Orðin, sem er eitt af betri lögum plötunnar. Daníel söng einnig lagið Tilfinningar á annarri plötu sama listamanns, Ef ég hefði vængi, sem kom út árið 1993. En það sama ár var Daníel valinn besti söngvarinn á Íslensku tónlistarverðlaununum, en það var í fyrsta sinn sem þau voru haldin undir því nafni. Hann var auk þess tilnefndur í flokkunum besti lagahöfundurinn og besti textahöfundurinn.

Eftir að hafa unnið með Nýdanskri að plötunni Hunang og byrjað með þeim í tónlistarflutningi Gauragangs eftir Ólaf Hauk Símonarson ákvað Daníel að yfirgefa sveitina og snúa sér að störfum með fjöllistarhópnum Gus Gus sem með tímanum þróaðist í það að verða hljómsveitin Gus Gus og gerði það gott með sveitinni erlendis. Á árunum 1994 og 1996 kom hann við sögu í uppfærslu söngleikjanna Súperstar og Stonefree en báðir þessir söngleikjir voru í tónlistarumsjón félaga Daníels úr Nýdönsk; Jóns Ólafssonar. Þegar safnað var saman mannskap til að syngja inn á safnplötu til heiðurs Jóhanni G. Jóhannssyni sem hlaut heitið Asking for love var Daníel einn þeirra sem hóað var í og brást hann vel við.

Árið 1998 var nafn Daníels Ágústs Haraldssonar aftur á dagskrá Íslensku tónlistarverðlaunanna og hann valinn besti söngvari það ár.

Bárður Örn Bárðarson (Tónlist.is – desember 2013).

Hópar

Hópur 1 Stöður Frá Til
Nýdönsk Söngvari 1987

Skjöl


Tengt efni á öðrum vefjum

Söngvari og tónlistarmaður
Ekki skráð

Jón Hrólfur Sigurjónsson uppfærði 26.08.2019