Hjalti Þórðarson 19.12.1911-11.02.1980

Hjalti Þórðarson organisti og bóndi á Æsustöðum lézt á heimili sínu 11. febrúar sl. og var útför hans gerð frá Lágafellskirkju þann 19. sama mánaðar að viðstöddu miklu fjölmenni, en hafðir voru til taks tveir stórir áætlunarbílar til þess að taka við öllum þeim, sem ekki komust inn í kirkjuna til að veita honum hinztu virðingu.

Hjalti var fæddur að Æsustöðum 19, desember 1911 og þar dvaldi hann alla sína ævidaga, en 1935 tók hann við búi af foreldrum sínum, þeim Þórði Jónssyni frá Varmá og Kristínu Vigfúsdóttur frá Hamrakoti í Andakílshreppi, yngstur þriggja systkina.

12 eða 13 ára fer hann að Laxnesi til að læra á orgel hjá Sigríði Guðjónsdóttur. Bar það skjótan árangur og árið 1926 fær han 60 króna styrk hjá Lágafellssöfnuði til þess að sækja orgelnámskeið í Reykjavík, en þar kenndu þeir bræðurnir Sigurður og Páll Ísólfssynir. Í nóvember það sama ár tók hann síðan við starfi orgelleikara í Lágafellskirkju þá tæplega 15 ára gamall. Við eldskírnina var viðstaddur sjálfur biskupinn yfir Ísland, herra Jón Helgason, og má nærri geta, að minna hefði þurft til þess að fá óharðnaðan ungling til að skjálfa! En allt gekk þó vel og Hjalti starfaði fyrir Lágafellssókn næstu 45 árin. Ég vil benda á grein, sem birtist 1972 í organistablaðinu, 3. tbl. 5. árg., sem þáverandi prestur við Lágafellssókn, Bjarni Sigurðsson, skrifaði um Hjalta, er hann lét af starfi þar. Það var þó ekki eingöngu Lágafellskirkja, sem starf Hjalta náði til, heldur voru það einnig Brautarholtskirkja, allt fram til 1946, Árbæjar- og Viðeyjarkirkju og seinna meir einnig Mosfellskirkja.

Árið 1972 tekur hann að sér þjónustu við Þingvallakirkju og gegndi hann því allt til dauðadags. Hann á því að baki sér 54 ára farsælan starfsferil í þjónustu kirkjunnar.

Hjalti var einnig virkur félagi í karlakórnum Stefni og raddæfði hann einnig oft félaga sína, síðast nokkrum dögum fyrir andlát sitt. 7. desember 1935 gekk Hjalti í hjónaband með eftirlifandi konu sinni Hlíf Gunnlaugsdóttur, dóttur hjónanna Gunnlaugs Jóns Torfasonar og Þuríðar Ólafsdóttur frá Meiriháttardal í Súðavíkurhreppi, en hún fluttist í Mosfellssveitina 1931. Eina dóttur eignuðust þau Hjalti og Hlíf, Þuríði Dóru, en hún hefur dyggilega starfað fyrir kirkjuna, sungið í kirkjukórum frá unglingsaldri og starfað mikið að safnaðarmálum.

Hjalta Þórðarsonar er hvarvetna minnzt með hlýhug og innilegu þakklæti.

S.O. Organistablaðið 1. október 1980, bls. 19.

Staðir

Lágafellskirkja Organisti 1926-1972
Brautarholtskirkja á Kjalarnesi Organisti 1926-1946
Árbæjarkirkja Organisti -
Viðeyjarkirkja Organisti -
Mosfellskirkja Organisti -
Þingvallakirkja Organisti 1972-1980

Tengt efni á öðrum vefjum

Hugi Þórðarson uppfærði 12.12.2014